अंबरनाथ, ता. २६ (वार्ताहर) : नगर परिषदेचे अग्निशमन दल प्रमुख भागवत सोनोने यांना त्यांच्या उल्लेखनीय आणि धाडसी सेवेबद्दल राज्य सरकारतर्फे स्मृतिचिन्ह देऊन गौरविण्यात आले. मुंबईतील बीकेसी मैदानावर पार पडलेल्या ‘अग्निशमन सेवा सप्ताह’ समारोप कार्यक्रमात हा सन्मान प्रदान करण्यात आला.
राज्याचे अप्पर मुख्य सचिव डॉ. के. एच. गोविंदराज आणि सहसचिव प्रियंका छापवाले यांच्या हस्ते सोनोने यांना सन्मानित करण्यात आले. सोनोने यांनी अंबरनाथ आणि कुळगाव-बदलापूर या दोन्ही नगरपालिकांच्या अग्निशमन यंत्रणा सक्षम करण्यात महत्त्वाची भूमिका बजावली आहे. ७० मीटर उंचीचे अत्याधुनिक शिडी वाहन ताफ्यात दाखल करणे, पाच नवीन अग्निशमन केंद्रे उभारणे आणि अपुऱ्या मनुष्यबळावर मात करण्यासाठी प्रशिक्षित फायरमनची भरती करणे ही त्यांची प्रमुख कामे आहेत.​ २००५चा महापूर, २०१९ मधील महालक्ष्मी एक्स्प्रेस बचाव कार्य, तौक्ते आणि निसर्ग चक्रीवादळे, तसेच कोविड-१९ महामारीच्या काळात त्यांनी केलेले कार्य अत्यंत प्रशंसनीय राहिले आहे.