डोक्यावर लोखंड पडून कामगाराचा मृत्यू
बोईसर, ता. २६ (वार्ताहर) : एमआयडीसीलगत सरावली ग्रामपंचायत हद्दीतील करमतारा इंजिनिअरिंग या कारखान्यातील अपघातात विकास कुमार (वय २५) या कामगाराचा मृत्यू झाला. याप्रकरणी बोईसर पोलिसांकडून तपास सुरू करण्यात आला आहे.
मिळालेल्या माहितीनुसार, शनिवारी (ता. २५) काम करताना विकास कुमार याच्या डोक्यावर लोखंडी वस्तू पडल्याने तो गंभीर जखमी झाला. त्याला तत्काळ खासगी रुग्णालयात दाखल करण्यात आले. मात्र, प्रकृती चिंताजनक झाल्याने पुढील उपचारासाठी मुंबईतील ऑरबिट रुग्णालयात हलविण्यात आले होते. उपचारादरम्यान त्याचा मृत्यू झाला. त्यानंतर टेंभोडे येथील उपजिल्हा रुग्णालयात शवविच्छेदन करण्यात आले.