कल्याण, ता. २६ (वार्ताहर) : पश्चिमेतील बेतुरकरपाडा परिसरात उभी असलेली रिक्षा चोरट्यांनी नेल्याची घटना उघडकीस आली आहे. याप्रकरणी महात्मा फुले चौक पोलिस ठाण्यात गुन्हा दाखल केला असून पोलिसांनी तपासाची चक्रे फिरवली आहेत. रिक्षाचालक श्रवण त्रिपाठी (वय ४०) यांनी याबाबत तक्रार नोंदवली आहे. त्यांची रिक्षा २३ एप्रिलच्या रात्री ते २४ एप्रिल सकाळदरम्यान पंचमुखी हनुमान मंदिराच्या मागील सार्वजनिक रस्त्यावर उभी होती. मात्र, सकाळी रिक्षा जागेवरून गायब असल्याचे निदर्शनास आले. परिसरात शोध घेऊनही रिक्षाचा कोणताही मागमूस लागला नाही. रिक्षेची किंमत ८० हजार रुपये असल्याचे तक्रारीत नमूद आहे. या घटनेमुळे परिसरातील रिक्षाचालकांमध्ये भीतीचे निर्माण झाली असून, वाहनांच्या सुरक्षेबाबत चिंता व्यक्त केली जात आहे. पोलिसांनी चोरट्याविरोधात गुन्हा दाखल केला असून पुढील तपास हवालदार साळुंखे करत आहेत.