सकाळ वृत्तसेवा
ठाणे, ता. २७ : शहरात अल्पवयीन मुले व मुली बेपत्ता होण्याच्या घटनांमध्ये चिंताजनक वाढ होत असल्याचे दिसून येत आहे. वागळे इस्टेट, घोडबंदर रोड, मुंब्रा आणि ठाणे शहर परिसरातून सहा अल्पवयीन मुले-मुली बेपत्ता झाल्याच्या नव्या घटना समोर आल्या आहेत. त्यामध्ये चार मुली व दोन मुलांचा समावेश आहे. या घटनांमुळे पालकांमध्ये भीतीचे वातावरण निर्माण झाले आहे.
मुंब्रा येथील संतोषनगर परिसरातून २५ एप्रिलला रात्री आठच्या सुमारास १३ वर्षीय मुलगा अचानक बेपत्ता झाला. २६ एप्रिलला पहाटे अमृतनगर, मुंब्रा येथील १७ वर्षीय मुलगी कोणालाही न सांगता घरातून निघून गेली ती अद्याप परतलेली नाही. ठाणे पश्चिमेतील होतकरू मैदान परिसरातून २३ एप्रिलला १५ वर्षीय मुलगा घरातून निघून गेला. किसननगर क्रमांक २ येथे २५ एप्रिलला सायंकाळी १६ वर्षीय मुलगी मैत्रिणीकडे जाते असे सांगून घराबाहेर पडली; मात्र परतली नाही. याशिवाय, रूपादेवी पाडा येथे त्याच दिवशी सायंकाळी १५ वर्षीय मुलगी कोणालाही न सांगता घरातून निघून गेली. तसेच, घोडबंदर रोड परिसरात २३ एप्रिलच्या मध्यरात्री १६ वर्षीय मुलगी बेपत्ता झाल्याची घटना घडली असून ती अद्याप सापडलेली नाही. या सर्व प्रकरणांमध्ये पालकांच्या तक्रारीनुसार संबंधित पोलिस ठाण्यांत अपहरणाचे गुन्हे दाखल करण्यात आले असून पुढील तपास सुरू आहे.