पनवेल, ता. २८ (वार्ताहर) : भारतीय स्टेट बँकेकडून स्टँड अप इंडिया योजनेअंतर्गत कर्ज मंजूर करून देण्याच्या बहाण्याने एकाने तब्बल १८ जणांची २० लाख ८१ हजारांची आर्थिक फसवणूक केल्याची घटना समोर आली आहे. संतोष तात्याबा नलावडे याच्या विरोधात पनवेल शहर पोलिसांनी फसवणुकीचा गुन्हा दाखल केला आहे.

संतोष नलावडे हा करंजाडे येथे राहण्यास असून, तो त्याच भागात श्री स्वामी समर्थ ई-सेवा केंद्र चालवत होता. करंजाडे येथे राहणारा तक्रारदार शुभम पाटील (वय ३२) हा ऑक्टोबर २०२४ मध्ये आधार कार्डच्या कामासाठी संतोषच्या ई-सेवा केंद्रात गेला होता. त्या वेळी नलावडे याने शुभमला स्टेट बँकेकडून ८२ लाखांचे स्टँड अप इंडिया कर्ज मंजूर करून देण्याचे प्रलोभन दाखवले. शुभमला डम्पर खरेदी करून स्वत:चा व्यवसाय सुरू करायचा असल्याने त्याने संतोषच्या माध्यमातून ४२ लाखांचे कर्ज घेण्याची तयारी दर्शविली. हे कर्ज मंजूर करण्यासाठी संतोषने कागदपत्रे, फाइल मेकिंग आणि प्रक्रिया शुल्काच्या नावाखाली शुभमकडून वेळोवेळी साडेतीन लाख उकळले. मात्र, दीड वर्ष उलटूनही कर्ज न मिळाल्याने शुभम १५ एप्रिलला संतोषच्या केंद्रावर आपले पैसे परत मागण्यासाठी गेला होता. मात्र, तो केंद्र बंद करून पळून गेल्याचे त्याच्या निदर्शनास आले. तसेच त्याच्यासारखेच फसवणूक झालेले अनेक नागरिक त्या ठिकाणी जमल्याचे शुभमच्या लक्षात आले. त्यानंतर फसवणूक झालेल्या १८ व्यक्तींनी पनवेल शहर पोलिस ठाण्यात धाव घेऊन तक्रार दाखल केली.