कचराभूमीतून धुराचे लोट
तारापूर औद्योगिक क्षेत्रातील प्रकार
बोईसर, ता. ४ (वार्ताहर) : तारापूर औद्योगिक क्षेत्रातील मोकळ्या भूखंडावरील कचरा जाळण्यात येत आहे. या प्रकारामुळे परिसरातील नागरिकांच्या आरोग्याला धोका निर्माण झाला आहे.
प्लॅस्टिक व इतर घातक कचरा जाळल्याने उठणाऱ्या दाट काळ्या धुरामुळे कामगार, प्रवासी, शालेय विद्यार्थी, स्थानिक नागरिक अक्षरशः त्रस्त झाले आहेत. सालवड ग्रामपंचायतीकडून येथे हा कचरा टाकला जात आहे, पण त्या कचऱ्याला कोणीतरी आग लावत असल्याने परिसर धुराच्या विळख्यात सापडला आहे. त्यामुळे कारखान्यांच्या प्रदूषणाबरोबर विषारी धुराचा बंदोबस्त करण्याची वेळ आली आहे.
--------------------
प्रशासनाचा कानाडोळा
- धुरामुळे श्वास घेण्यास त्रास, डोळ्यांची जळजळ, घशात खवखव अशा तक्रारी वाढल्या आहेत. विशेष म्हणजे, या ठिकाणी भटकी जनावरे कचरा खात असल्याने त्यांनाही धोका निर्माण झाला आहे.
- प्रखर उन्हात कचऱ्याची उष्णता, त्यातून उठणारा धूर यामुळे परिसरातील वातावरण असह्य झाले आहे. संबंधित प्रशासनाने तातडीने कारवाई करून हा प्रकार बंद करावा, अशी मागणी होत आहे.