भिवंडी, ता. ४ (वार्ताहर) : महाराष्ट्रात १ मेपासून स्वगणना मोहिमेची सुरुवात करण्यात आली आहे. प्रथमच डिजिटल पद्धतीने होत असलेल्या या जनगणना प्रक्रियेत १ ते १५ मेदरम्यान नागरिकांनी स्वतःहून स्वगणना करावी, असे आवाहन भिवंडीचे तहसीलदार अभिजित खोले यांनी केले आहे. तालुक्यात जनगणनेसाठी ८५२ प्रगणक गट तयार करण्यात आले आहेत. दुसऱ्या टप्प्यात १६ मे ते १४ जूनदरम्यान प्रगणकांकडून घरयादी आणि घरगणना करण्यात येणार आहे. नागरिकांनी https://se.census.gov.in या संकेतस्थळावर जाऊन कुटुंबप्रमुखाच्या माध्यमातून स्वतःची व कुटुंबातील सदस्यांची माहिती भरून अद्ययावत करावी, असे आवाहन प्रशासनाकडून करण्यात आले आहे. राष्ट्रीय जनगणना कार्यात नागरिकांनी सक्रिय सहभाग नोंदवून प्रशासनाला सहकार्य करावे, असेही तहसीलदार खोले यांनी म्हटले आहे.