स्वयंस्फूर्तीने ऑनलाइन स्वगणना करावी
वनमंत्री गणेश नाईक यांचे नागरिकांना आवाहन
नवी मुंबई, ता. ४ (वार्ताहर) : गणेश नाईक यांनी नागरिकांना जनगणना २०२७ मध्ये सक्रिय सहभाग घेण्याचे आवाहन केले आहे. देशाच्या सर्वांगीण विकासासाठी अचूक माहिती आवश्यक असल्याने प्रत्येकाने स्वयंस्फूर्तीने ऑनलाइन स्वगणना करावी, असे त्यांनी सांगितले. १ मे महाराष्ट्र दिनापासून जनगणनेच्या पहिल्या टप्प्याला सुरुवात झाली असून, नाईक यांनी स्वतः घराची स्थिती, कुटुंबाची माहिती व उपलब्ध सुविधा याबाबत ३३ सोप्या प्रश्नांची उत्तरे भरून स्वगणना पूर्ण केली.
या उपक्रमावेळी महापौर सुजाता पाटील आणि शहर जनगणना अधिकारी उपआयुक्त संजय शिंदे उपस्थित होते. नागरिकांना १५ मेपर्यंत अधिकृत संकेतस्थळावर माहिती भरता येणार असून, त्यानंतर मिळणारा कोड प्रगणकांना देणे आवश्यक आहे. दुसऱ्या टप्प्यात १६ मे ते १४ जूनदरम्यान अधिकारी घरी भेट देऊन माहिती पडताळणार आहेत. महापौर आणि आयुक्तांनीही नागरिकांना सहकार्य करण्याचे आवाहन केले आहे.