सकाळ वृत्तसेवा
ठाणे, ता. ४ : वागळे इस्टेट, येऊर आणि घोडबंदर या परिसराला लागून संजय गांधी राष्ट्रीय उद्यान आहे. या ठिकाणाहून वाट चुकून अनेकदा बिबटे व अन्य प्राणी लोक वस्त्यांमध्ये येतात. अशातच वागळे इस्टेट भागातील संजय गांधी उद्यानालगत असलेल्या कैलास नगर परिसरात बिबट्याचा वावर आढळून आहे. यामुळे परिसरातील नागरिकांमध्ये भीतीचे वातावरण निर्माण झाले असून, प्रशासनाने नागरिकांना सतर्कतेचा इशारा दिला आहे.

मागील काही महिन्यांपूर्वी मानपाडा येथील इडेन वूड कॉम्प्लेक्समध्ये बिबट्याने भटक्या श्वानावर हल्ला केला होता. त्यानंतर डिसेंबर २०२५ मध्ये पोखरण रोड क्र. २ परिसरातील बेथनी हॉस्पिटलजवळील बांधकामाचे ठिकाणी आणि सनलाईट इमारत परिसरात बिबट्याचे दर्शन झाल्याने नागरिकांमध्ये घबराट पसरली होती. जानेवारीमध्ये वागळे इस्टेटमधील वारली पाडा भागात बिबट्याने लोकवस्तीत घुसून एका पाळीव श्वानावर हल्ला केल्याची घटना सीसीटीव्हीतही कैद झाली होती. त्यातच आता वागळे इस्टेट येथील कैलास नगर परिसरात बिबट्याचा वावर दिसून आल्याने नागरिकांमध्ये भीतीचे वातावरण पसरले आहे. शिवसेनेचे नगरसेवक मनोज शिंदे यांनी नागरिकांना शांतता राखण्याचे आवाहन करत आवश्यक ती खबरदारी घेण्याचे आवाहन केले आहे.