१३ लाखांच्या अपहारप्रकरणी आरोपीस अटक
फसवणुकीच्या गुन्ह्यांतील सहआरोपी फ्लॅटमालकाचा शोध सुरू

अंधेरी, ता. ६ (बातमीदार) ः १३ लाखांच्या मोठ्या ठेवीच्या अपहारप्रकरणी अब्दुल रज्जाक शेख ऊर्फ डाबला या आरोपीस समतानगर पोलिसांनी अटक केली. फसवणुकीच्या याच गुन्ह्यात तो सध्या पोलिस कोठडीत आहे.
शब्बीर हद्दीश शेख ऊर्फ पप्पू हा फ्लॅटमालक सहआरोपी असून त्याचा पोलिसांकडून शोध सुरू आहे. यातील तक्रारदार महिला कांदिवली परिसरात राहते. तिच्या चाळीतील रूम पुनर्विकासासाठी गेल्याने तिला भाड्याने एक रूम हवी होती. याचदरम्यान तिच्या पतीचा मित्र असलेल्या अब्दुलने त्याचा मित्र शब्बीर याचा कांदिवलीतील बाणडोंगरी, सुमुख हिल्स इमारतीमध्ये एक फ्लॅट असल्याचे सांगितले होते. त्यामुळे ती तिच्या पतीसोबत शब्बीरला भेटून फ्लॅट पाहण्यासाठी गेली होती. या वेळी शब्बीरने तिचा अकराव्या मजल्यावर फ्लॅट असल्याचे सांगून त्याला तो फ्लॅट १३ लाखांच्या हेवी डिपॉझिटवर द्यायचे आहे, असे सांगितले. तिने त्याच्यासोबत भाडेकरार केला होता. त्यासाठी तिने त्याला १३ लाख रुपये दिले होते. त्यापैकी १० लाख ऑनलाइन तर तीन लाख कॅश स्वरूपात दिले होते; मात्र त्याने तिला फ्लॅटचा ताबा दिला नाही. त्याच्याकडून फ्लॅटचा ताबा देण्यास उशीर होत असल्याने तिने त्यांच्यातील व्यवहार रद्द करून तिच्या पैशांची मागणी सुरू केली होती; मात्र त्याने फ्लॅटचा ताबा दिला नाही किंवा हेवी डिपॉझिटची रक्कमही परत केली नाही. फसवणुकीचा हा प्रकार लक्षात येताच तिने अब्दुल शेख आणि शब्बीर शेख यांच्याविरुद्ध समतानगर पोलिसांत तक्रार केली होती. पोलिसांनी गुन्हा नोंदवून तपास सुरू केला होता. याच गुन्ह्यात दीड महिन्यांपासून फरार असलेल्या अब्दुल शेख याला पोलिसांनी दोन दिवसांपूर्वी अटक केली.