ठाणे, ता. ६ : मुंब्रा येथील कौसा परिसरात जामा मशीदसमोर रस्त्यावर उभ्या असलेल्या कारला बुधवारी मध्यरात्री साडेबाराच्या सुमारास आग लागल्याची घटना घडली. या घटनेत कोणालाही दुखापत झाली नाही. कार अचानक पेटल्याची माहिती ठाणे महापालिकेच्या आपत्ती व्यवस्थापन कक्षाला मुंब्रा अग्निशमन दलाकडून मिळाली. अग्निशमन दलाचे जवान अग्निशामक आणि रेस्क्यू वाहनासह तत्काळ घटनास्थळी दाखल झाले. त्यांनी तत्परतेने आगीवर नियंत्रण मिळविण्यासाठी प्रयत्न सुरू केले. १.१० च्या सुमारास आग पूर्णपणे आटोक्यात आणण्यात त्यांना यश आले. आगीचे नेमके कारण अद्याप स्पष्ट झालेले नाही. तसेच संबंधित वाहनाच्या मालकाची ओळख अद्याप समोर आलेले नाही, अशी माहिती आपत्ती व्यवस्थापन कक्षेने दिली.