बेकायदा बांधकामांवर बुलडोझर
बोईसरमधील गाळे, निवासी खोल्या जमीनदोस्त

बोईसर, ता. ६ : बोईसर मंडळ हद्दीतील मौजे काटकर, सरावलीतील बेकायदा बांधकामांवर मंगळवारी महसूल विभागाने कारवाई केली. या वेळी गाळे तसेच निवासी खोल्या जमीनदोस्त करण्यात आल्या.
काटकर येथील रामचंद्रनगर, गणेशनगर परिसरात संदीप संखेने उभारलेले १० हजार ४२० चौरस फूट क्षेत्रातील चार वाणिज्य गाळे, विनोद बारगा यांच्यासह नऊ निवासी खोल्या तसेच दीपक पटेल यांचे पत्र्याचे तीन वाणिज्य गाळे हटवण्यात आले. याशिवाय सरावली येथील अवधनगर परिसरात निर्मला नामदेव घरत यांचे दोन अपूर्ण वाणिज्य गाळेही पाडण्यात आले. या कारवाईदरम्यान नऊ वाणिज्य गाळे, नऊ निवासी खोल्यांचे अनधिकृत बांधकाम हटविण्यात आले.
---------------------------
कठोर कारवाईचा इशारा
अविभाज्य शर्तीच्या जागेवर कोणतीही अधिकृत परवानगी न घेता बांधकाम सुरू असल्याची माहिती महसूल विभागाला मिळाल्यानंतर तातडीने कारवाई करण्यात आली. तसेच अशा प्रकारच्या बेकायदा बांधकामांविरोधात भविष्यातही कठोर कारवाई करण्याचा इशारा महसूल विभागाने दिला आहे.