वाडा-मनोर महामार्गावर उद्रेक
काँग्रेसच्या आंदोलनाने अर्धा तास वाहतूक ठप्प

वाडा, ता. ६ (बातमीदार) ः वाडा-मनोर महामार्गावरील वरले गावालगतच्या रस्त्यावर खोदकामामुळे रमेश पवारचा अपघाती मृत्यू झाला होता. या घटनेतील पीडितांना नुकसानभरपाई देण्याच्या मागणीसाठी काँग्रेसच्या वतीने वाडा-मनोर महामार्गावर बुधवारी (ता. ६) आंदोलन करण्यात आले.
वरले गावालगतच्या बांधकामाजवळ सुरक्षेच्या अनुषंगाने बॅरिकेड्स नसल्याने रमेश पवारची दुचाकी खड्ड्यात पडली होती. या अपघातात डोक्याला गंभीर दुखापत होऊन रमेशचा मृत्यू झाला. या घटनेला सार्वजनिक बांधकाम विभागाचे अधिकारी जबाबदार असल्याने त्यांच्यावर सदोष मनुष्यवधाचा गुन्हा दाखल करण्याची मागणी काँग्रसचे जिल्हाध्यक्ष प्रफुल पाटील यांनी केली. या वेळी जवळपास अर्धा तास रास्ता रोको करण्यात आला. या वेळी आंदोलकांची पोलिस निरीक्षक दत्तात्रय किंद्रे यांनी घटनास्थळी भेट घेतली. तसेच तहसीलदार, सार्वजनिक बांधकाम विभागाचे अधिकारी व ईगल कंपनीचे अधिकारी यांच्यासोबत तहसीलदार कार्यालयात बैठक घेण्याचे आश्वासन देण्यात आले.
------------------------
वाहनांच्या रांगा
आंदोलकांनी कंपनीविरोधात जोरदार घोषणाबाजी केली. तसेच बांधकाम कंपनी, सार्वजनिक बांधकाम विभागाच्या अधिकाऱ्यांवर तातडीने गुन्हा दाखल करण्याची मागणी केली. या वेळी आंदोलनामुळे काही काळासाठी वाहतूक ठप्प झाल्याने वाहनांच्या रांगा लागल्या होत्या.