लग्नबंधनात अडकली २१ जोडपी
जीवदानीच्या पायथ्याशी थाटामाटात लग्नसोहळा

विरार, ता. ६ (बातमीदार) ः विरारच्या जीवदानी मंदिराच्या पायथ्याशी सामुदायिक विवाह सोहळा उत्साहात पार पडला. या वेळी मोठ्या थाटामाटात वधुवरांची २१ जोडपी विवाहबंधनात अडकली.
सोहळ्यासाठीची जय्यत तयारी संस्थानतर्फे करण्यात आली होती. यानिमित्ताने सनई चौघडा, लग्नविधीसाठी बोलावलेले भटजी तसेच जमलेल्या वरातींच्या साक्षीने सोहळा साजरा झाला. जीवदानी देवी मंदिर संस्थानतर्फे वधुवरांना मणीमंगळसूत्र, पोशाखाबरोबर संसारोपयोगी वस्तू भेट देण्यात आली. तर लायन्स क्लबतर्फे नवदाम्पत्यांना भेटवस्तू देण्यात आल्या. या कार्यक्रमाला वसई-विरारचे महापौर अजीव पाटील, माजी महापौर राजीव पाटील, विरोधी पक्षनेता मनोज पाटील, नगरसेवक प्रशांत राऊत, सदानंद पाटील, रोहन सवलत, नरेंद्र पाटील यांच्यासह विविध मान्यवर उपस्थित होते. या सोहळ्याचे यजमानपद जीवदानी देवी संस्थानचे अध्यक्ष प्रदीप तेंडुलकर, उपाध्यक्ष पंकज ठाकूर यांनी भूषवले.