चारकोपमधील चौकाची दुरवस्था
कारवाईची नागरिकांची मागणी

मालाड, ता. ७ (बातमीदार) : कांदिवली पश्चिमेच्या चारकोप परिसरातील स्वर्गीय माजी उपमुख्यमंत्री गोपीनाथ मुंडे यांच्या स्मरणार्थ एक चौक उभारण्यात आला आहे. दरम्यान, या सुसज्ज अशा चौकाची दुरवस्था झाली आहे. चारकोप, सह्याद्रीनगर आणि बंदर पाखाडी रस्त्यांच्या नाक्यावर असलेल्या या महत्त्वाचा चौकाच्या बोर्डावर सध्या अनधिकृत जाहिराती लावण्यात आल्याने तो विद्रूप झाल्याचे चित्र असून, याबाबत प्रशासनाने कारवाई करावी, अशी मागणी स्थानिक नागरिकांनी केली आहे.

आधुनिक साहित्याचा वापर करून उभारलेला हा चौक देखभालीअभावी खराब अवस्थेत गेला आहे. पालिकेच्या ‘आर दक्षिण’ विभागाकडून नियमित देखभाल होत नसल्याने नागरिकांमध्ये नाराजी व्यक्त होत आहे. स्थानिक भाजप नगरसेवकांच्या पुढाकारातून हा चौक उभारण्यात आला होता. मात्र, त्यानंतर त्याच्या देखभालीकडे दुर्लक्ष झाल्याचा आरोप रहिवाशांनी केला आहे. ‘ ज्येष्ठ नेत्यांच्या स्मरणार्थ उभारलेले चौक जर अशा अवस्थेत असतील, तर अशा स्मारकांचा उपयोग काय,’ असा सवाल नागरिक उपस्थित करत आहेत. चौकाची तातडीने दुरुस्ती व स्वच्छता करून नियमित देखभाल करावी, अशी मागणी स्थानिकांकडून होत आहे.