महामार्ग प्रशासनाची माॅन्सूनपूर्व कामांना गती
नाले स्वच्छता, दुरुस्तीला प्राधान्य

कासा, ता. ६ (बातमीदार) : दरवर्षीप्रमाणे पावसाळ्यात उद्भवणाऱ्या समस्यांवर नियंत्रण मिळवण्यासाठी महामार्ग प्रशासनाने मॉन्सूनपूर्व तयारीला वेग दिला आहे. पावसाळ्यात महामार्गावर पाणी साचल्यामुळे होणारी वाहतूक कोंडी व अपघातांचे प्रमाण कमी करण्यासाठी विविध उपाययोजना राबवण्यात येत आहेत.

या पार्श्वभूमीवर तलासरी व विवळवेढे परिसरातील उड्डाणपुलांखालील पावसाच्या पाण्याचा निचरा करणाऱ्या नाल्यांची स्वच्छता व दुरुस्तीची कामे हाती घेण्यात आली आहेत. नाल्यांमध्ये साचलेली माती, कचरा व राडारोडा यामुळे पाण्याच्या प्रवाहास अडथळा येत असल्याने या ठिकाणी प्राधान्याने स्वच्छता मोहीम राबवली जात आहे. यंत्रसामग्री व मनुष्यबळाच्या सहाय्याने नाले साफ करून पावसाचे पाणी सुरळीत वाहून जाण्याची व्यवस्था करण्यात येत आहे.
सध्या ही मोहीम तलासरी व विवळवेढे येथे सुरू असली तरी महामार्गावरील इतर महत्त्वाच्या ठिकाणांवरही टप्प्याटप्प्याने कामे केली जाणार आहेत. प्रमुख उड्डाणपुलांखालील नाले व गटारे स्वच्छ करण्यास प्राधान्य देण्यात येत असून, कामांवर देखरेख ठेवण्यासाठी स्वतंत्र पथके नियुक्त करण्यात आली आहेत. ही पथके नियमित पाहणी करून कामात अडथळे येऊ नये याची दक्षता घेत आहेत.
-----------
आपत्कालीन स्थितीसाठी सज्ज

याशिवाय पावसाळ्यापूर्वी खराब झालेल्या रस्त्यांची दुरुस्ती, आवश्यक ठिकाणी डांबरीकरण, दिशादर्शक फलकांची दुरुस्ती व धोकादायक वळणांवर सूचना फलक बसविण्याची कामेही सुरू आहेत. आपत्कालीन परिस्थितीला सामोरे जाण्यासाठी महामार्ग प्रशासनाने पोलिस व स्थानिक प्रशासनाशी समन्वय साधला आहे. मॉन्सून सुरू होण्यापूर्वी सर्व तांत्रिक व स्वच्छताविषयक कामे पूर्ण करून प्रवाशांचा प्रवास सुरक्षित व सुरळीत ठेवण्याचा प्रशासनाचा प्रयत्न असल्याची माहिती अधिकाऱ्यांनी दिली.