ओवळे गावात सिडकोच्या भूसंपादन मोजणीला ग्रामस्थांचा विरोध
उलवे, ता. ६ (बातमीदार): पनवेल तालुक्यातील उलवे परिसरातील ओवळे गावात सिडकोकडून भूसंपादनासाठी सुरू करण्यात आलेल्या मोजणीवरून सोमवारी तणाव निर्माण झाला. कोणतीही पूर्वसूचना न देता सर्वेक्षण सुरू केल्याचा आरोप करत ग्रामस्थ आणि शेतकरी आक्रमक झाले व त्यांनी कामाला तीव्र विरोध केला. संबंधित जमीन कोणत्या प्रकल्पासाठी घेतली जात आहे, त्याचे स्वरूप काय आणि मोबदला किती मिळणार याबाबत स्पष्ट माहिती न दिल्याने ग्रामस्थांमध्ये नाराजी पसरली आहे.
आमदार विक्रांत यांनी शेतकऱ्यांची संमती आणि सविस्तर चर्चा केल्याशिवाय काम सुरू करू नये, तसेच पारदर्शक धोरण जाहीर करण्याचे निर्देश दिले. ग्रामस्थांनी विकासाला विरोध नसल्याचे स्पष्ट करत विश्वासात न घेता होणारे निर्णय मान्य नसल्याचा इशारा दिला. सरपंच रुपेश गायकवाड, नंदराज मुंगाजी, सचिन गायकवाड यांच्यासह ग्रामस्थ उपस्थित होते.