विद्युत रोहित्राने जीवाला घोर

बोईसर, ता. ६ (वार्ताहर) : तारापूर औद्योगिक परिसरातील रस्ता, गटार बांधकामादरम्यान महावितरणचे उच्चदाबाच्या विद्युत रोहित्रामुळे अपघाताची भीती आहे. या रोहित्रामुळे वाहतुकीस अडथळा निर्माण होत असून नागरिकांची सुरक्षा धोक्यात आली आहे.
रोहित्रातून सुमारे ११ हजार व्होल्ट क्षमतेचा विद्युत प्रवाह वाहत असल्याने परिस्थिती धोकादायक झाली आहे. तसेच काही ठिकाणी रोहित्र रस्त्याच्या कडेला असल्याने वाहनचालकांना मार्ग काढताना मोठी कसरत करावी लागत आहे. पादचारी, दुचाकीस्वारांना धोका वाढला आहे. रस्ता रुंदीकरण, गटार बांधकामामुळे उपलब्ध जागा कमी झाल्याने रोहित्राभोवती आवश्यक सुरक्षित अंतर राखलेले नसल्याचे दिसून येत आहे. काही ठिकाणी संरक्षणासाठी कुंपणही अपुरे असल्याने दुर्घटनेची भीती आहे.