उल्हासनगर, ता. ६ (वार्ताहर) : उल्हासनगरातील लेडीज बारमध्ये महिला वेटर्सना निश्चित वेळेनंतर सेवा देण्यास बंदी असतानाही ग्राहकांना सेवा सुरू असल्याचे पोलिसांनी टाकलेल्या धाडीत आढळून आले. मध्यवर्ती पोलिसांनी बार व्यवस्थापक आणि चालकाविरोधात गुन्हा दाखल केला आहे.
शांतीनगर रोड परिसरातील ‘रंगीला/टोपाझ लेडीज सर्व्हिस बार’वर मंगळवारी (ता. ५) रात्री १०.५० वाजण्याच्या सुमारास मध्यवर्ती पोलिस ठाण्याच्या पथकाने छापा टाकला. कारवाईदरम्यान आठ महिला वेटर्स उशिरापर्यंत ग्राहकांना सेवा देताना आढळून आल्या. याप्रकरणी बार व्यवस्थापक फैजुद्दीन कुरदूस मौलीक (वय ४६) आणि बारचालक सत्यवर्धन राव यांच्याविरोधात गुन्हा दाखल करण्यात आला. पोलिस शिपाई कृपाल शेकडे यांनी तक्रार दिली असून, पुढील तपास हवालदार जाधव करत आहेत.