सांगे कौटुंबीच्या पाड्याला सिमेंटचा रस्ता
श्रमजीवी संघटनेच्या प्रयत्नांना यश

वाडा, ता. ७ (बातमीदार) ः तालुक्यातील सांगे कौटुंबीचा पाडा रस्त्याअभावी विविध अडचणींचा सामना करीत होता. श्रमजीवी संघटनेच्या माध्यमातून प्रशासकीय स्तरावर पाठपुरावा केला जात होता. अखेर पाड्यासाठीचा हक्काचा काँक्रीटचा रस्ता पूर्ण झाल्याने आनंदाचे वातावरण पसरले आहे.
भौगोलिकदृष्ट्या दुर्गम भागातील सांगे कौटुंबीचा पाड्यातील नागरिक मूलभूत सुविधेपासून वंचित होते. ही भीषण परिस्थिती बदलण्यासाठी श्रमजीवी संघटनेने २०२३ पासून लढा पुकारला आहे. तहसील कार्यालय, गटविकास अधिकारी कार्यालयावर निवेदने, मोर्चातून प्रशासनाचे लक्ष वेधण्यात आले. यासाठी पालघर जिल्हा महिलाप्रमुख रेखा पऱ्हाड, वाडा तालुकाध्यक्ष भरत जाधव, तालुका सचिव सूरज दळवी, माजी उपाध्यक्ष सुरेश पऱ्हाड यांनी केलेले मार्गदर्शन मोलाचे राहिले.
---------------------
ग्रामस्थांमध्ये आनंदोत्सव
आमच्या अनेक पिढ्यांनी रस्त्यासाठी प्रतीक्षा केली; पण श्रमजीवी संघटनेच्या कार्यकर्त्यांच्या निःस्वार्थी कष्टांमुळे स्वप्न सत्यात उतरले आहे, अशी कृतज्ञता स्थानिक ग्रामस्थांनी व्यक्त केली.