मुरबाड, ता. ७ (वार्ताहर) : तालुक्यातील शिवळे येथे एका अल्पवयीन मुलाने चोरीच्या उद्देशाने घरात प्रवेश करून, प्रतिकार करणाऱ्या महिलेवर चाकूने वार करून तिला जीवे मारण्याचा प्रयत्न केल्याची घटना समोर आली आहे. या प्रकरणी मुरबाड पोलिस ठाण्यात गुन्हा दाखल करण्यात आला आहे.
शिवळे येथील आपल्या राहत्या घरी सोमवारी (ता. ४) रात्री ८ वाजण्याच्या सुमारास सायली संजय उसासे झोपल्या होत्या. याच वेळी एका १२ वर्षे १० महिने वयाच्या मुलाने घराच्या पाठीमागील खिडकीवाटे घरात प्रवेश केला. कपाटातील ऐवज चोरण्याच्या उद्देशाने त्याने कपाट उघडले असता, आवाजामुळे सायली यांना जाग आली. त्यांनी या चोरीला विरोध करण्याचा प्रयत्न केला. यावेळी या मुलाने धारदार चाकूने सायली यांच्या छातीवर, मानेवर, पोटावर आणि पाठीवर वार केले. या हल्ल्यात त्या जखमी झाल्या असून त्यांच्यावर उपचार सुरू आहेत. या प्रकरणी गणेश काळूराम इसामे (वय ४१) यांनी मुरबाड पोलिस ठाण्यात फिर्याद दिली आहे.