उल्हासनगरच्या शासकीय रुग्णालयात तोडफोड
रुग्णाच्या मृत्यूनंतर संतप्त नातेवाइकांचा राडा

उल्हासनगर, ता. ७ (वार्ताहर) : उल्हासनगर शासकीय मध्यवर्ती रुग्णालयात एका रुग्णाच्या मृत्यूनंतर संतप्त नातेवाइकांनी बुधवारी मध्यरात्री मोठा गोंधळ घालत रुग्णालयात तोडफोड केली. या घटनेमुळे काही काळ रुग्णालय परिसरात तणावपूर्ण वातावरण निर्माण झाले होते.

मिळालेल्या माहितीनुसार, भगवान उत्तम निंभोरे (४२) यांना प्रकृती गंभीर असल्याने बुधवारी रात्री उपचारासाठी उल्हासनगरच्या शासकीय मध्यवर्ती रुग्णालयात दाखल करण्यात आले होते. डॉक्टरांकडून उपचार सुरू असतानाच मध्यरात्रीच्या सुमारास त्यांचा मृत्यू झाला. मृत्यूची माहिती मिळताच नातेवाईक आणि काही नागरिकांनी संताप व्यक्त करत रुग्णालय प्रशासनावर निष्काळजीचे आरोप केले. त्यानंतर जमावाने आक्रमक होत रुग्णालयातील काचा फोडल्या आणि काही वैद्यकीय उपकरणांचे नुकसान केले. या गोंधळात रुग्णालयातील कर्मचारी आणि सुरक्षा रक्षकांनाही धक्काबुक्की करण्यात आली. घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली.
=====
कर्मचाऱ्यांचे कामबंद आंदोलन
दरम्यान, या घटनेच्या निषेधार्थ गुरुवारी सकाळी रुग्णालय प्रशासन आणि कर्मचाऱ्यांनी कामबंद आंदोलन सुरू केले. आरोपींना तत्काळ अटक करावी आणि रुग्णालयातील सुरक्षाव्यवस्था वाढवावी, अशी मागणी या वेळी करण्यात आली. त्यानंतर महापौर अश्विनी निकम, नगरसेविका सविता तोरणे, समाजसेवक शिवाजी रगडे तसेच पोलिस अधिकाऱ्यांनी रुग्णालयात भेट देऊन कर्मचाऱ्यांशी चर्चा केली. संबंधित आरोपींवर कठोर कारवाई करून लवकरच अटक करण्यात येईल, असे आश्वासन दिल्यानंतर आंदोलन मागे घेण्यात आले. सध्या या प्रकरणाचा पुढील तपास पोलिसांकडून सुरू आहे.