निवृत्त नौदल अधिकाऱ्याची ४२ लाखांची फसवणूक
घरबसल्या कमाईचे प्रलोभन; कोपरखैरणे पोलिसांत गुन्हा दाखल

नवी मुंबई, ता. ७ (वार्ताहर) : घरबसल्या मोठी कमाई करण्याचे प्रलोभन दाखवत सायबर भामट्यांनी एका निवृत्त भारतीय नौदल अधिकाऱ्याची तब्बल ४२ लाख ५१ हजार रुपयांची फसवणूक केल्याची धक्कादायक घटना नवी मुंबईत उघडकीस आली आहे. याप्रकरणी कोपरखैरणे पोलिसांनी अज्ञात सायबर गुन्हेगारांविरोधात गुन्हा दाखल करून तपास सुरू केला आहे.
फसवणूक झालेले ६० वर्षीय निवृत्त नौदल अधिकारी कोपरखैरणे सेक्टर ७ परिसरात राहतात. मे २०२५ मध्ये सायबर गुन्हेगारांनी त्यांच्याशी टेलिग्रामद्वारे संपर्क साधला होता. सुरुवातीला गुगल मॅप्सवर विविध हॉटेल्सना रेटिंग देण्याचे सोपे काम देण्यात आले. त्या बदल्यात चांगला आर्थिक परतावा मिळेल, असे सांगून त्यांचा विश्वास संपादन करण्यात आला. यानंतर अधिक नफा मिळवून देण्याचे प्रलोभन दाखवत आरोपींनी त्यांना विविध बँक खात्यांमध्ये पैसे गुंतवण्यास प्रवृत्त केले. त्यानुसार ३ मे ते २४ मे २०२५ या कालावधीत निवृत्त अधिकाऱ्यांनी वेगवेगळ्या खात्यांवर ऑनलाइन पद्धतीने एकूण ४२ लाख ५१ हजार रुपये पाठवले. मात्र, एवढी मोठी रक्कम गुंतवूनही कोणताही परतावा मिळाला नाही. तसेच गुंतवलेली मूळ रक्कमही परत न मिळाल्याने आपली फसवणूक झाल्याचे त्यांच्या लक्षात आले. यानंतर त्यांनी कोपरखैरणे पोलिस ठाण्यात तक्रार दाखल केली.