रेल्वेत फेरीवाल्यांना अधिकृत करू नका!
शिवसेना ठाकरे गट आक्रमक

सकाळ वृत्तसेवा
मुंबई, ता. ७ ः रेल्वेच्या उपनगरी गाड्यांमध्ये फेरीवाल्यांचा उपद्रव वाढला असताना रेल्वे प्रशासन फेरीवाल्यांना ओळखपत्र देण्याच्या विचारात आहे; मात्र त्यामुळे असुरक्षितता वाढेल. त्यामुळे रेल्वे प्रशासनाच्या याबाबतच्या धोरणावर शिवसेना (उद्धव ठाकरे) पक्षाने जोरदार आक्षेप घेतला आहे.
रेल्वे प्रशासनाकडून काही फेरीवाल्यांना ओळखपत्र देऊन अधिकृत करण्याची प्रक्रिया सुरू असल्याचे समोर आले आहे; मात्र या निर्णयावरच शिवसेना ठाकरे पक्षाने आक्षेप घेतला आहे. ओळखपत्र देणे म्हणजे नियंत्रण नव्हे; तर गैरवापराला आमंत्रण असल्याचे शिवसेनेने म्हटले आहे. अशा ओळखपत्रांचा वापर करून अधिक फेरीवाले बेकायदा रेल्वे गाड्यांमध्ये प्रवेश करतील आणि त्यांच्यावर कारवाई करणे अधिक कठीण होईल, असेही शिवसेनेचे म्हणणे आहे. खासदार पाटील यांनी केंद्रीय रेल्वेमंत्री अश्विनी वैष्णव तसेच मध्य रेल्वेच्या महाव्यवस्थापकांना पत्र पाठवून तत्काळ कारवाईची मागणी केली आहे.
...
प्राधान्य कशाला?
रेल्वे प्रवासादरम्यान मोबाईल, पाकीट चोरी, महिलांच्या डब्यांमधील छेडछाड व चोरीच्या घटना वाढल्या आहेत. प्रवाशांच्या सुरक्षेला प्राधान्य द्यायचे की फेरीवाल्यांना, असा सवाल शिवसेना ठाकरे पक्षाचे खासदार संजय पाटील यांनी केला आहे.