सकाळ वृत्तसेवा
ठाणे, ता. ८ : जलजीवन मिशन व स्वच्छता भारत मिशन (ग्रामीण) अंतर्गत काम करणाऱ्या कर्मचाऱ्यांचे पाच महिन्यांपासून वेतन रखडल्याचे नुकतेच समोर आले आहे. यानंतर आता राष्ट्रीय ग्रामीण आरोग्य अभियानांतर्गत कर्मचाऱ्यांचेही दोन महिन्यांचे वेतन रखडले आहे. ई-स्पर्श या नव्या प्रणालीचा फटका कर्मचाऱ्यांना बसला आहे.
राष्ट्रीय आरोग्य अभियानांतर्गत विविध शासकीय रुग्णालयात कंत्राटी पद्धतीवर अधिकारी आणि कर्मचारी काम करीत आहेत. राज्य सरकारमार्फत राबविण्यात येणाऱ्या विविध आरोग्यविषयक उपक्रमांमध्ये या अधिकारी-कर्मचाऱ्यांनी योगदान दिले. तुटपुंजे मानधन ते ही वेळेत मिळत नसल्याने त्यांच्यामध्ये नाराजी पसरली आहे. अशातच ठाणे जिल्ह्यातील सामान्य रुग्णालय, उपजिल्हा रुग्णालय, जिल्हा परिषद आरोग्य सेवेत महत्त्वाची भूमिका बजावणाऱ्या परिचारिका, प्रयोगशाळा तंत्रज्ञ, आरोग्य सहाय्यक, काउन्सेलर, वैद्यकीय अधिकारी आदी एक हजार १०० कर्मचारी काम करत आहेत. या कर्मचाऱ्यांचे मार्च आणि एप्रिल महिन्याचे वेतन रखडल्याची माहिती सूत्रांनी दिली. महागाईच्या काळात पगारविना संसाराचा गाडा ओढणे कठीण होत असल्याने अनेक कर्मचाऱ्यांनी नाराजी व्यक्त केली आहे.