सकाळ वृत्तसेवा
ठाणे, ता. ८ : काही दिवसांपासून राज्यात महिलांवरील अत्याचारात प्रचंड वाढ झाली आहे. त्यातही लहान मुलींवर अमानुष अत्याचार केले जात आहेत. अत्याचार करणाऱ्या नराधमांना फासावर लटकवावे, या मागणीसाठी राष्ट्रवादी शरदचंद्र पवार पक्षाचे राष्ट्रीय सरचिटणीस डाॅ. जितेंद्र आव्हाड यांच्या सुचनेनुसार तथा जिल्हाध्यक्ष मनोज प्रधान यांच्या मार्गदर्शनाखाली ठाणे महिलाध्यक्ष, नगरसेविका मनीषा भगत यांच्या नेतृत्वाखाली मुंब्रा येथे कँडल मार्च काढण्यात आला.
पुणे जिल्ह्यातील नसरापूर येथे साडेतीन ते चार वर्षांच्या चिमुरडीवर झालेला अत्याचार आणि तिची निर्घृण हत्या या घटनेविरोधात हा कँडल मार्च काढण्यात आला. मुंब्रा स्थानक ते डाॅ. बाबासाहेब आंबेडकर चौकदरम्यान काढलेल्या मार्चमध्ये शेकडो महिला-लहान मुली सहभागी झाल्या होत्या. भारतरत्न डाॅ. बाबासाहेब आंबेडकर चौक येथे अत्याचारात बळी पडलेल्या चिमुकलीला आदरांजली अर्पण करून कँडल मार्चचा समारोप करण्यात आला. यावेळी भगत म्हणाल्या, नसरापूर, अकोला, ठाणे येथे नराधमांनी लहान मुलींना लक्ष्य केले आहे. ज्या छत्रपती शिवाजी महाराजांनी महिलांवर अत्याचार करणाऱ्यांचा चौरंगा केला होता. त्याच महाराष्ट्रामध्ये महिला सुरक्षित नाहीत. गुन्हेगाराला कोणतीही जात धर्म नसतो. अशा गुन्हेगारांना कठोर शिक्षा झाली पाहिजे. या लहान मुलीचा काय दोष होता? असा सवाल करताना घटनेतील नराधमाला अत्यंत कठोर शिक्षा झाली पाहिजे, अशी मागणी करण्यात आली.