छत्रपतींच्या पुतळ्यावरून राजकारण तापले
तब्बल अडीच वर्षांनी दुरुस्तीचा निर्णय
भाईंदर, ता. ८ (बातमीदार) : काशी मिरा नाक्यावरील छत्रपती शिवाजी महाराजांच्या अश्वारूढ पुतळ्याची दुरुस्ती करण्याचा निर्णय पालिकेने घेतला आहे. मात्र, हा पुतळा स्थलांतरित केला जाणार असल्याचा आरोप होत आहे.
त्यामुळे मिरा-भाईंदरचे राजकारण चांगलेच तापले आहे. छत्रपतींचा पुतळा उभारून ३० वर्षांचा कालावधी लोटल्याने पालिकेच्या संरक्षणात्मक परिक्षणात पुतळ्याच्या तातडीने दुरुस्ती करण्याचे नमूद करण्यात आले आहे. विशेष म्हणजे, ठाण्याचे तत्कालीन जिल्हाधिकारी अशोक शिनगारे यांनी २०२२ मध्येच पुतळा स्थलांतरित करण्यात यावा, असे निर्देश महपालिकेला दिले होते. या ठिकाणी मेट्रो जात असल्याने पुतळ्याच्या आजूबाजूचे रस्ते उंच झाले आहेत. मात्र, अडीच वर्षांच्या प्रशासकीय काळात त्यावर कोणतीही हालचाल झाली नाही. बुधवारी (ता. ६) झालेल्या महासभेत प्रशासनाने पुतळ्याच्या दुरुस्तीचा प्रस्ताव दिला. त्यावर सत्ताधारी भाजपने पुतळ्याची तातडीने दुरुस्ती करण्यात करावी, असा निर्णय घेतला, पण विरोधकांनी पुतळ्याच्या स्थलांतराला विरोध केला आहे, तर विविध संघटना, राजकीय पक्षांकडूनही आंदोलनाची भाषा केली जात आहे. त्यामुळे शहरातले वातावरण तापण्याची शक्यता वर्तवली जात आहे.
०००००००००००००००००००००००००००
उपमहापौरांचे स्पष्टीकरण
शहरात पाणी समस्या, अनधिकृत फेरीवाले, वाहतूक कोंडी अशा विविध ज्वलंत विषय भेडसावताना कोणतीही आंदोलने होत नाहीत. छत्रपतींच्या पुतळ्यावरून राजकारणावरून सामान्य नागरिकांकडून नाराजी व्यक्त केली जात आहे, तर दुसरीकडे केवळ पुतळ्याच्या दुरुस्तीचा निर्णय झाला असून, पुतळा स्थलांतराबाबत कोणताही निर्णय घेण्यात आला नसल्याचे उपमहापौर ध्रुवकिशोर पाटील यांनी स्पष्ट केले.