फुप्फुसावरील शस्त्रक्रियेनंतर बेडवर बसून परीक्षा
युग चितालियाला ८५.२० टक्के गुण

मुंबई, ता. ८ ः दहिसर येथील युग चितालियाने फुप्फुसावर शस्त्रक्रिया झाल्यानंतर दुसऱ्याच दिवशी बेडवर बसून दहावीच्या गणिताचा पेपर देत दहावीच्या परीक्षेत तब्बल ८५.२० टक्के गुण मिळवले.
दहावीच्या परीक्षेला सुरुवात होण्यापूर्वीच फुप्फुसाच्या आजाराने ग्रासलेले असताना वर्षभर परीक्षेसाठी केलेली तयारी वाया जाऊ नये असा निश्चय त्याने केला होता. यामुळेच त्याने बेडबर बसून परीक्षा दिली आणि त्याला हे यश आल्याची माहिती युगचे वडील विमल चितालिया यांनी दिली.
कांदिवली पूर्व येथील ठाकूर विद्या मंदिर हायस्कूल व ज्युनियर कॉलेजमध्ये युग दहावीत शिकत होता. दहिसर येथून तो या शाळेत येऊन शिक्षण घेत होता. मात्र, परीक्षेच्या काही दिवस अगोदर त्याला त्रास सुरू झाला होता. २३ फेब्रुवारीला परीक्षा सुरू झाली; परंतु त्याची तब्येत १७ फेब्रुवारीपासून बिघडली होती. यामुळे पालकांनी त्याला यादरम्यान परीक्षेसाठी आलेले कांदिवली पूर्व येथील सेंट लॉरेन्स हायस्कूल हे परीक्षा केंद्र बदलून मागितले होते. त्याला प्रतिसादही मिळाल्यानंतर दहिसर येथे घराच्या जवळचे परीक्षा केंद्र मिळाले. आजार सुरू असतानाच त्याने २३ ते २७ फेब्रवारीपर्यंतचे तीन पेपर या परीक्षा केंद्रावरून दिले. मात्र, ४ मार्चला त्याला खूपच त्रास झाल्याने त्याच्यावर ५ मार्च रोजी पहाटे ठाण्यातील डॉ. भानुशाली रुग्णालयात शस्त्रक्रिया झाली. यामुळे त्याच्या कुटुंबीयांनी युगकडून दहावीचे पुढील पेपर दिले जातील, यासाठीची आशा सोडून दिली होती. मात्र, शाळेने त्याला पेपर लिहिण्यासाठी डॉक्टर परवानगी देतील काय, अशी विचारणा केली आणि त्यासाठी डॉक्टरांनी परवानगी दिली. यानंतर राज्य शिक्षण मंडळाने पुढाकार घेत त्याला ठाण्यातील रुग्णालयात थेट बेडवरून बसून परीक्षा देण्यासाठी परवानगी दिली, पुढे एक लेखनिकही पुरविल्याने त्याने शस्त्रक्रिया झालेल्या दुसऱ्याच दिवशी ६ मार्चला असलेला गणिताचा पेपर बेडवरून दिल्याची माहिती त्याचे विमल चितालिया यांनी दिली.
...
तातडीने निर्णय!
युगचे शैक्षणिक नुकसान होऊ नये, यासाठी तातडीने निर्णय घेण्यात आला. त्याला बेडवरून परीक्षा देण्यासाठी सर्व यंत्रणा पुरविण्यात आली. लेखनिक देण्यात आला. यामुळे त्याला ही परीक्षा सहजपणे देता आली आणि त्याने त्याला चांगले यश मिळाल्याचे विभागीय मंडळाचे अध्यक्ष डॉ. सुभाष बोरसे यांनी सांगितले.