‘श्रमजीवी’च्या अध्यक्षपदी सीता घाटाळ

विरार (बातमीदार) ः श्रमजीवी संघटनेने सुवर्णमहोत्सवी वर्षाकडे वाटचाल करताना लोकशाही पद्धतीने नवे नेतृत्व निवड प्रक्रिया राबवली आहे. या नव्या पर्वाचे नेतृत्व सीता घाटाळ ही आदिवासी महिला करणार आहे.
नवोदय विद्यालयात शिकताना कबड्डी, खो-खोसारख्या खेळांत जिल्हास्तरावर चमकणाऱ्या सीता घाटाळ यांना आयपीएस अधिकारी होण्याचे स्वप्न होते; मात्र आर्थिक परिस्थितीमुळे बारावीनंतर शिक्षण थांबवून कुटुंबाची जबाबदारी त्यांनी स्वीकारली. अंगणवाडी सेविकेपासून सुरू झालेला प्रवास आंदोलनांपर्यंत पोहोचला. कुपोषणाविरोधातील लढ्यांमध्ये त्यांनी तुरुंगवासही भोगला. प्रत्येक आदिवासी आंदोलनाच्या अग्रभागी त्या उभ्या असतात.