कंत्राटी कर्मचाऱ्यांना दिलासा
विरार (बातमीदार)ःवसई-विरार महापालिकेसह जिल्ह्यातील विविध नगरपालिकांमध्ये १० ते १५ वर्षांपासून कंत्राटी पद्धतीने सेवा बजावणाऱ्या कर्मचाऱ्यांना कायमस्वरूपी सेवेत सामावून घेण्याबाबत राज्य सरकार सकारात्मक असल्याचे संकेत पालघरचे पालकमंत्री तथा वनमंत्री गणेश नाईक यांनी दिले आहेत. याबाबतची एक बैठक मंत्रालयात घेणार असल्याचे आश्वासन त्यांनी जनता दरबारात दिले. वसई-विरार पालिकेच्या विविध विभागात चारशेहून अधिक ठेका कर्मचारी अनेक वर्षांपासून कार्यरत आहेत. मात्र, इतकी वर्षे सेवा देऊनही त्यांना अद्याप कायमस्वरूपी नोकरीत सामावून घेतलेले नाही. वसई-विरार महापालिका क्षेत्रात विकासकामांसाठी कोट्यवधींचा निधी खर्च होत असताना कंत्राटी कर्मचाऱ्यांना कायम केल्यास १५० कोटींचा निधी लागणार आहे.