ठाणे, ता. १० : हरवलेल्या मोबाईलचा शोध घेण्यात कळवा पोलिसांना मोठे यश मिळाले आहे. सीईआयआर पोर्टल आणि तांत्रिक तपासाच्या आधारे तब्बल १८ लाख ६५ हजार रुपये किमतीचे ११० मोबाईल शोधून ते मूळ मालकांना परत करण्यात आले आहेत.

कळवा पोलिस ठाण्याच्या हद्दीत २०२५ आणि २०२६ या कालावधीत मोबाईल हरवल्याच्या अनेक तक्रारी दाखल झाल्या होत्या. या हरवलेल्या मोबाईलचा शोध घेण्याच्या सूचना वरिष्ठ पोलिस निरीक्षक अशोक उतेकर, पोलिस निरीक्षक (गुन्हे) अनिल गायकवाड आणि पोलिस निरीक्षक (प्रशासन) विठ्ठल नावडे यांनी गुन्हे प्रकटीकरण पथकाला दिल्या होत्या. त्यानुसार मोबाईलची माहिती सीईआयआर पोर्टलवर अपलोड करून वापरणाऱ्यांचे पत्ते शोधले. एकूण ११० मोबाईल ताब्यात घेत मूळ मालकांना परत दिले. ही कारवाई पोलिस उपायुक्त सुभाषचंद्र बुरसे आणि सहाय्यक पोलिस आयुक्त प्रिया डमाळे यांच्या मार्गदर्शनाखाली पार पडली.