सिडको एम्प्लॉईज युनियनच्या उपाध्यक्षपदी सुधीर कोळी यांची निवड
तुर्भे (बातमीदार) : सुधीर कोळी यांची सिडको एम्प्लॉईज युनियनच्या उपाध्यक्षपदी निवड करण्यात आली आहे. त्यांच्या निवडीमुळे कर्मचारीवर्गात आनंदाचे वातावरण निर्माण झाले असून, विविध स्तरांतून त्यांच्यावर अभिनंदनाचा वर्षाव होत आहे. सहकारी कर्मचारी, मित्रपरिवार तसेच सामाजिक आणि सांस्कृतिक क्षेत्रातील मान्यवरांकडून त्यांना शुभेच्छा दिल्या जात आहेत. सुधीर कोळी यांनी यापूर्वीही सिडको आर्टिस्ट कम्बाईनच्या अध्यक्षपदाची जबाबदारी यशस्वीपणे सांभाळली आहे. त्यांच्या नेतृत्वाखाली विविध सांस्कृतिक कार्यक्रम, कर्मचारी एकोप्याचे उपक्रम आणि सामाजिक बांधिलकी जपणाऱ्या अनेक योजना प्रभावीपणे राबविल्या होत्या. नव्या जबाबदारीतून कर्मचारी हिताचे प्रश्न प्रभावीपणे मांडणे, संघटनेला अधिक बळकट करणे तसेच कर्मचारी कल्याणासाठी नवीन उपक्रम राबविण्यावर ते भर देतील, असा विश्वास सहकाऱ्यांनी व्यक्त केला आहे.