भूगोल विभागात
नवे अभ्यासक्रम
रिमोट सेन्सिंग, डेटा मॅपिंग आणि भू-विश्लेषणचे प्रशिक्षण

मुंबई, ता. १२ : मुंबई विद्यापीठाच्या भूगोल विभागाने आधुनिक तंत्रज्ञान, संशोधन आणि राष्ट्रीय शैक्षणिक धोरणाच्या अनुषंगाने ‘भूगोल आणि भू-स्थानिक तंत्रज्ञान’ या विषयात एम.ए. आणि एम.एस्सी. अभ्यासक्रम सुरू केले आहेत. या माध्यमातून विद्यार्थ्यांना जीआईएस, रिमोट सेन्सिंग, डेटा मॅपिंग आणि भू-विश्लेषण यांसारख्या आधुनिक कौशल्यांचे प्रशिक्षण मिळणार आहे.
राष्ट्रीय शैक्षणिक धोरणाअंतर्गत विभागामार्फत विद्यार्थ्यांना संशोधनाधारित शिक्षणाची मोठी संधी उपलब्ध होणार आहे. या अभ्यासक्रमात पृथ्वी प्रणाली विज्ञान, नागरी व प्रादेशिक नियोजन, हवामान बदल विज्ञान व शाश्वतता अध्ययन, मानवी भूगोल आणि भू-स्थानिक तंत्रज्ञान अशी पाच विशेष अभ्यास शाखा उपलब्ध करून देण्यात आल्या आहेत. विद्यार्थ्यांना व्यावसायिक अनुभव मिळावा, यासाठी आयआयटी मुंबई, एमएमआरडीए, ठाणे महापालिका, प्रजा फाउंडेशन, आयआयटी रुरकी, मंत्रालयीन विभाग तसेच इतर नामांकित संस्थांमध्ये इंटर्नशिपची संधी उपलब्ध करून दिली जाणार आहे.