पावसाळ्यात नागरिकांना त्रास होणार नाही याची दक्षता घ्या
वनमंत्री गणेश नाईक यांनी घेतला माॅन्सूनपूर्व कामांचा आढावा
वाशी, ता. १३ (बातमीदार)ः आगामी पावसाळ्यात नवी मुंबईतील नागरिकांना कोणत्याही प्रकारच्या समस्यांना सामोरे जावे लागू नये, यासाठी वनमंत्री नामदार गणेश नाईक यांनी वाशी येथे आयोजित करण्यात आलेल्या मॉन्सूनपूर्व आढावा बैठकीत महापालिका प्रशासनाला महत्त्वपूर्ण निर्देश दिले. वाशीतील सिडको प्रदर्शनी केंद्रामध्ये पार पडलेल्या या बैठकीत माजी खासदार संजीव नाईक, महापौर सुजाता पाटील, उपमहापौर दशरथ भगत, सभागृह नेते सागर नाईक, महापालिकेचे आयुक्त डॉ. कैलास शिंदे, अतिरिक्त आयुक्त सुनील पवार, नगर अभियंता शिरीष आरदवाड, महापालिकेचे वरिष्ठ अधिकारी तसेच लोकप्रतिनिधी उपस्थित होते.
शहरातील सखल भागांमध्ये पाणी साचू नये आणि पूरस्थिती निर्माण होऊ नये, यासाठी सर्व यंत्रणांनी सज्ज राहण्याचे निर्देश वनमंत्री नाईक यांनी दिले.
पावसाळ्यात शॉर्टसर्किटमुळे जीवित व मालमत्तेची हानी होऊ नये, यासाठी उघड्या विजेच्या तारा, डीपी बॉक्स, ट्रान्स्फॉर्मर आणि धोकादायक विद्युत यंत्रणांची तात्काळ दुरुस्ती करण्याचे आदेश देण्यात आले.
शाळा सुरू होण्यापूर्वी सर्व शाळा इमारतींची दुरुस्ती पूर्ण करावी तसेच विद्यार्थ्यांच्या सुरक्षेच्या दृष्टीने शाळांमधील सीसीटीव्ही कॅमेरे कार्यरत आहेत की नाही, याची तपासणी करण्याच्या सूचनाही त्यांनी दिल्या. मुसळधार पावसामुळे डोंगर परिसरातून मातीचे लोंढे खाली येऊन दुर्घटना टाळण्यासाठी प्रतिबंधात्मक उपाययोजना करण्याचे निर्देशही देण्यात आले. पावसाळ्यात साथीचे आजार पसरू नयेत, यासाठी आरोग्य विभागाने विशेष दक्षता घ्यावी, असेही त्यांनी स्पष्ट केले. महापालिकेच्या रुग्णालयांमधून नवी मुंबईतील रुग्णांना प्राधान्याने आरोग्य सुविधा उपलब्ध करून देण्याचे आदेशदेखील वनमंत्री नाईक यांनी दिले.