बेघर कुटुंबाला हक्काचे घर!
श्रमजीवी संघटनेच्या पाठपुराव्याला यश

वाडा, ता. १३ (बातमीदार) ः शासकीय योजनेचा लाभ घेण्यासाठी आवश्यक कागदपत्रे नसल्याने आंबिस्ते खुर्द येथील एका कातकरी कुटुंबावर उघड्यावर संसार थाटण्याची वेळ आली होती; पण श्रमजीवी संघटनेमुळे अखेर या कुटुंबाला घर दुरुस्तीसाठी एक लाख २० हजारांचा निधी मंजूर झाल्याने हक्काचा निवारा मिळाला आहे.
तालुक्यातील आंबिस्ते खुर्द (देवळाची वाडी) येथील रहिवासी कै. पुंडलिक दिवा यांची पत्नी, चार मुलांसह गेली अनेक वर्षे कुणाच्या तरी मंडपात, नातेवाईक किंवा मंदिरात आश्रय घेऊन राहत होते. वर्षानुवर्षे ऊन, वारा, पाऊस, कडाक्याच्या थंडीत उघड्यावर वास्तव्य करावे लागत होते. ही बाब श्रमजीवी संघटनेच्या कार्यकर्ता ॲड. प्रशांत काशिद यांच्या निदर्शनास आल्यानंतर सातत्याने पाठपुरावा केला. वाडा गटविकास अधिकारी वैभव शिंदे तसेच ग्रामपंचायत आंबिस्तेचे ग्रामसेवक भास्कर आंधळे यांच्या मदतीने अखेर कुटुंबाला हक्काचे पक्के घर मिळवून देण्यात यश आले आहे. प्रशासनाकडून जुने मोडलेले घर दुरुस्ती आणि पडझड निधीअंतर्गत एक लाख २० हजार रुपयांची रक्कम प्राप्त झाली. त्यामुळे कायमचा आसरा मिळाला आहे.
---------------------------
मोलाचे योगदान
श्रमजीवी संघटनेचे वाडा तालुकाध्यक्ष भरत जाधव, सचिव सूरज दळवी, उपाध्यक्ष आदेश वाघ यांच्या मार्गदर्शनाखाली संपूर्ण पाठपुरावा करण्यात आला. यामध्ये गणप्रमुख नितीन सवर, गणपत सवर, ॲड. प्रशांत काशिद यांनी विशेष परिश्रम घेत मोलाची कामगिरी केली.