टोकावडे, ता. १४ (बातमीदार) : मुरबाड तालुक्यातील प्राथमिक शिक्षकांची हक्काची आर्थिक संस्था म्हणून ओळख असलेल्या गव्हर्नमेंट अँड अंडरटेकिंग गव्हर्नमेंट सर्व्हंट्स पतपेढीच्या अध्यक्षपदी भगवान भगत यांची बिनविरोध निवड करण्यात आली आहे. त्यांच्या निवडीमुळे शिक्षक वर्गातून समाधान व्यक्त होत आहे.
२००६ मध्ये मुरबाड तालुक्यातील शिक्षकांच्या आर्थिक अडचणी दूर करण्याच्या उद्देशाने महेश देशमुख, भगवान भगत, योगेश चौधरी आणि त्यांच्या सहकाऱ्यांनी एकत्र येत या पतसंस्थेची स्थापना केली होती. सुरुवातीला १०१ सभासद आणि १० हजार रुपयांच्या भागभांडवलातून सुरू झालेली ही पतसंस्था आज २० वर्षांचा यशस्वी प्रवास पूर्ण केला आहे. तालुक्यातील शिक्षकांना गरजेच्या वेळी तत्काळ आर्थिक साह्य उपलब्ध करून देण्यात पतसंस्थेची महत्त्वपूर्ण भूमिका राहिली आहे. कोणताही मोबदला न घेता काम करणाऱ्या संचालकांमुळे संस्थेने विश्वासार्हता आणि लौकिक मिळवला आहे. पतसंस्थेच्या संचालक मंडळात भगवान भगत, योगेश चौधरी, मीनाक्षी देशमुख, सरिता विशे, रवींद्र घरत, दिलीप ईसामे, गौतम रातांबे, विष्णू पारधी, अनिल भोईर, राजेंद्र सूर्यराव आणि बबुशा चोरे यांचा समावेश आहे. निवडणूक अधिकारी विजयसिंग पाटील यांनी निवडणूक प्रक्रिया पार पाडली. अध्यक्षपदासाठी भगवान भगत यांचा एकमेव अर्ज प्राप्त झाल्याने त्यांची बिनविरोध निवड जाहीर करण्यात आली.