संभाजी महाराजांचे स्मारक बांधण्याची मागणी
मनसे विभाग अध्यक्ष योगेश शेटे यांच्याकडून निवेदन

तुर्भे, ता. १४ (बातमीदार) : छत्रपती धर्मवीर संभाजी महाराजांच्या जयंतीनिमित्त सानपाडा येथील धर्मवीर संभाजी महाराज चौकात छत्रपती संभाजी महाराजांचे स्मारक बांधण्याची मागणी मनसेचे विभाग अध्यक्ष योगेश शेटे यांनी महाराष्ट्र नवनिर्माण सेनेच्या वतीने नवी मुंबई महापालिकेचे महापौर, उपमहापौर व आयुक्त यांच्याकडे पत्राद्वारे केली.
सानपाडा सेक्टर आठ येथे सानपाडा पोलिस ठाणे (जुने) समोरील चौकाचे नवी मुंबई महापालिकेने १६ जानेवारी २००५ रोजी धर्मवीर संभाजी महाराज चौक असे नामकरण केले; मात्र २१ वर्षे उलटली तरी अद्याप सदर चौकात छत्रपती धर्मवीर संभाजी महाराज यांचे स्मारक बसविण्यासाठी नवी मुंबई महापालिकेकडून कोणत्याही प्रकारचे प्रयत्न करण्यात आलेले नसल्याचे मनसेचे विभाग अध्यक्ष योगेश शेटे यांनी महापौर, उपमहापौर व आयुक्त यांना दिलेल्या पत्रात म्हटले आहे.
छत्रपती धर्मवीर संभाजी महाराज यांच्या जयंती तसेच पुण्यतिथीनिमित्त शिवशंभू भक्त व शिवशंभूप्रेमींना संभाजी महाराजांच्या स्मारकाचे दर्शन घेण्यासाठी तसेच महाराजांना अभिवादन करण्यासाठी बाहेर जावे लागते. तसेच या ठिकाणी छत्रपती धर्मवीर संभाजी महाराज यांचे स्मारक नसल्याने आजही सदर चौक सानपाडा पोलिस ठाणे (जुने) किंवा सानपाडा पेट्रोल पंप म्हणून ओळखला जात आहे. त्यामुळे या चौकाची आता ओळख पुसली जात असल्याचे मनसेचे विभाग अध्यक्ष योगेश शेटे यांनी पत्रात सांगितले.