इंधन बचतीसाठी महावितरणचे एक पाऊल पुढे
पेट्रोल-डिझेलऐवजी विद्युत वाहनांचा वापर सुरू

सकाळ वृत्तसेवा
मुंबई, ता. १४ : इंधन बचतीबाबत पंतप्रधान नरेंद्र मोदी यांनी केलेल्या आवाहनाच्या पार्श्वभूमीवर महावितरणने एक पाऊल पुढे टाकले आहे. त्यानुसार कंपनीचे व्यवस्थापकीय संचालक लोकेश चंद्र यांच्यासह सर्व संचालक आणि कार्यकारी संचालकांनी आजपासून पेट्रोल व डिझेलऐवजी विद्युत वाहनांचा वापर सुरू केला आहे.
राज्य शासनाच्या विद्युत वाहन धोरण २०२५ला अनुसरून महावितरणने पेट्रोल व डिझेल वाहनांऐवजी विद्युत वाहनांना प्राधान्य दिले आहे. पहिल्या टप्प्यात महावितरणच्या मुख्य व्यवस्थापनातील वरिष्ठ अधिकाऱ्यांसाठी १० विद्युत वाहनांच्या खरेदीची प्रक्रिया राबविण्यात आली होती. महावितरणअंतर्गत सर्व मुख्य अभियंता तसेच क्षेत्रीय अधीक्षक अभियंता, कार्यकारी अभियंता, उपविभागप्रमुख अभियंता यांनाही पेट्रोल किंवा डिझेलऐवजी फक्त विद्युत वाहने उपलब्ध करून दिली जाणार आहेत.