भिवंडी, ता. १५ (बातमीदार) : समाज माध्यमावर मार्केटिंग क्षेत्रात काम करणाऱ्या अंजूरफाटा परिसरातील तरुणाला इन्स्टाग्राम खाते बंद करण्याची धमकी देत ऑनलाइन पद्धतीने ४१ हजार रुपये उकळण्यात आले आहेत. याप्रकरणी नारपोली पोलिस ठाण्यात अज्ञाताविरुद्ध सायबर फसवणूक आणि खंडणीचा गुन्हा दाखल करण्यात आला आहे.
पोलिसांच्या माहितीनुसार, अंजूरफाटा येथील लोटस इमारतीत राहणारा २३ वर्षीय तरुण समाज माध्यमावर मार्केटिंग क्षेत्रात कार्यरत आहे. sukunalG या टेलिग्राम आयडीचा वापर करणाऱ्या अज्ञात व्यक्तीने २४ मार्च ते ८ मे या कालावधीत त्याच्याशी संपर्क साधला होता. या दरम्यान तरुणाच्या इन्स्टाग्राम खात्यावर बनावट ‘स्ट्राइक्स’ टाकण्याची धमकी दिली. तसेच खाते कायमस्वरूपी बंद केले जाईल, अशी भीती दाखवत ऑनलाइन व्यवहारांद्वारे ४१ हजार रुपये उकळल्याची तक्रार करण्यात आली आहे. या धमक्यांमुळे आर्थिक नुकसानासोबतच मानसिक त्रासही सहन करावा लागल्याचे पीडित तरुणाने तक्रारीत नमूद केले आहे. दरम्यान, याप्रकरणी नारपोली पोलिसांनी गुन्हा दाखल केला असून पोलिस निरीक्षक आनंद पाटील या घटनेचा तपास करत आहेत. आरोपीचा टेलिग्राम आयडी, संबंधित ऑनलाइन व्यवहार आणि तांत्रिक पुराव्यांचे विश्लेषण करण्यात येत असल्याची माहिती पोलिसांनी दिली आहे.