कॅन्सरग्रस्तांना मुख्यमंत्री सहाय्यता निधीतून दिलासा
अलिबाग, ता. १५ (वार्ताहर) : रायगड जिल्ह्यात मुख्यमंत्री वैद्यकीय सहाय्यता निधीतून १ मे २०२५ ते ६ एप्रिल २०२६ या कालावधीत १३ कर्करोगग्रस्त रुग्णांना आर्थिक मदत देण्यात आली आहे. या योजनेमुळे गंभीर आजारांवरील महागड्या उपचारांसाठी सामान्य नागरिकांना मोठा दिलासा मिळाला आहे.
जिल्ह्यातील एकूण २५ रुग्णांचे अर्ज पाठविण्यात आले होते. त्यापैकी १९ अर्ज शस्त्रक्रियेसाठी तर ६ अर्ज केमोथेरपीसाठी होते. यातील १३ रुग्णांना प्रत्यक्ष लाभ मिळून त्यांना एकूण १० लाख ८० हजार रुपयांचा निधी वितरित करण्यात आला.
कॅन्सर, हृदयविकार व किडनीच्या आजारांवरील उपचार खर्चिक असल्याने आर्थिकदृष्ट्या दुर्बल रुग्णांसाठी ही योजना महत्त्वाची ठरत आहे. वार्षिक उत्पन्न १.६० लाखांपर्यंत असलेल्या पात्र रुग्णांना या निधीतून मदत दिली जाते. जिल्हास्तरावर सहाय्यता कक्ष उपलब्ध झाल्याने अर्ज प्रक्रिया अधिक सुलभ झाली आहे.