ठाणे रेल्वे स्थानकावर पोलिस शिपायाचा मोबाईल लांबवला
ठाणे, ता. १५ : ठाणे रेल्वे स्थानकावरील फलाट क्रमांक सातवर गर्दीचा फायदा घेत अनोळखी चोरट्याने मुंबई पोलिस दलातील एका पोलिस शिपायाचा ४२ हजार रुपये किमतीचा मोबाईल फोन लंपास केल्याची घटना गुरुवारी घडली. याप्रकरणी ठाणे रेल्वे पोलिस ठाण्यात चोरीचा गुन्हा दाखल करण्यात आला आहे.
नवी मुंबईत राहणारे सोमेश्वर गुरुपायाय स्वामी (वय २९) हे मुंबई पोलिस दलात पोलिस शिपाई म्हणून कार्यरत आहेत. त्यांना १४ मे रोजी मित्राच्या लग्नासाठी चाळीसगाव येथे जायचे असल्याने ते कोपरखैराणे येथून लोकलने ठाणे रेल्वे स्थानकावर आले होते. ते फलाट क्रमांक ७ वर गोरखपूर एक्स्प्रेसची वाट पाहत उभे होते. याचदरम्यान, काशी एक्स्प्रेस फलाटावर येत असताना त्यांनी मोबाईल पँटच्या उजव्या खिशात ठेवून जनरल डब्यात गर्दीतून प्रवेश केला. मात्र, डब्यात चढल्यानंतर मोबाईल तपासला असता तो मिळून आला नाही. याप्रकरणी ठाणे रेल्वे पोलिस ठाण्यात मोबाईल चोरीचा गुन्हा दाखल केला असून, पुढील तपास पोलिस करत आहेत.