मुंबई-वडोदरा महामार्गावर भीषण अपघात; भिवंडीतील दोन युवकांचा मृत्यू

भिवंडी, ता. १५ (वार्ताहर) : मुंबई-वडोदरा महामार्गावर दुगाड येथे झालेल्या भीषण अपघातात भिवंडीतील दोन युवकांचा दुर्दैवी मृत्यू झाला. शुक्रवारी (ता. १५) घडलेल्या या घटनेमुळे परिसरात हळहळ व्यक्त होत आहे. झिशान अन्सारी (वय २०, रा. पिरानी पाडा) आणि इमरान अन्सारी (वय २५, रा. पटेल कंपाउंड, धामणकर नाका) अशी मृतांची नावे आहेत. दोघेही वॉलपेपर लावण्याचे काम करीत होते.
कामानिमित्त अंबाडी परिसरात गेलेले झिशान आणि इमरान दुचाकीवरून भिवंडीकडे परतत होते. मोहिली-दुगाड परिसरात रस्ते बांधकामासाठी माल वाहतूक करणाऱ्या डम्परला त्यांच्या दुचाकीची जोरदार धडक बसली. अपघात इतका भीषण होता, की दोघांनाही गंभीर दुखापत होऊन मोठ्या प्रमाणात रक्तस्राव झाला आणि त्यांचा जागीच मृत्यू झाला.
घटनेची माहिती मिळताच गणेशपुरी पोलिस घटनास्थळी दाखल झाले. दोन्ही मृतदेह शवविच्छेदनासाठी भिवंडी येथील शासकीय उपजिल्हा रुग्णालयात पाठवण्यात आले आहेत. या दुर्घटनेमुळे मृत युवक राहत असलेल्या परिसरात शोककळा पसरली असून मुंबई-वडोदरा महामार्गावरील वाढत्या अपघातांबाबत पुन्हा चिंता व्यक्त केली जात आहे.