पनवेल, ता. २२ (बातमीदार) : कोरोनामध्ये आर्थिक संकटात सापडलेल्या शहरी पथविक्रेत्यांना (फेरीवाल्यांना) पुन्हा सक्षमपणे उभारी देण्यासाठी सुरू केलेल्या प्रधानमंत्री पथविक्रेता आत्मनिर्भर निधी (पीएम स्वनिधी) योजनेची अंमलबजावणी पालिकेमार्फत वेगाने सुरू आहे. या योजनेची मुदत आता डिसेंबर २०३० पर्यंत वाढविण्यात आली आहे. याअंतर्गत फेरीवाल्यांना कोणत्याही तारणाशिवाय खेळते भांडवली कर्ज, व्याज अनुदान आणि डिजिटल व्यवहारांसाठी विशेष प्रोत्साहन दिले जात आहे.

पनवेल पालिकेच्या दीनदयाळ अंत्योदय योजना-राष्ट्रीय नागरी उपजीविका अभियान विभागामार्फत पात्र पथविक्रेत्यांना तीन टप्प्यांत कर्ज उपलब्ध करून दिले जाते. पहिल्या टप्प्यात १५ हजार रुपये व परतफेड कालावधी १२ महिने, दुसऱ्या टप्प्यात २५ हजार रुपये व परतफेड कालावधी १८ महिने आणि तिसऱ्या टप्प्यात ५० हजार रुपये व परतफेड कालावधी ३६ महिने असे कर्ज दिले जाते. कर्जाची परतफेड वेळेत करणाऱ्या लाभार्थ्यांना पुढील टप्प्यातील कर्जासाठी पात्रता मिळते. योजनेंतर्गत लाभार्थ्यांना वार्षिक सात टक्के व्याज अनुदान मिळत असून, वेळेवर परतफेड करणाऱ्यांना कोणताही प्री-पेमेंट दंड आकारला जात नाही.