भिवंडी, ता. २२ (वार्ताहर) : तालुक्यातील मराडेपाडा येथील शिवक्षेत्र छत्रपती शिवाजी महाराज मंदिर शक्तीपीठात शिवक्रांती प्रतिष्ठान ट्रस्टच्या वतीने २६ व २७ जूनला शिवराज्याभिषेक सोहळा होणार असल्याची माहिती ट्रस्टचे संस्थापक विश्वस्त डॉ. राजू (भाऊ) चौधरी यांनी दिली.
छत्रपती शिवाजी महाराजांच्या राज्याभिषेक दिनानिमित्त या सोहळ्याला सांस्कृतिक कार्यमंत्री ॲड. आशीष शेलार यांची प्रमुख उपस्थिती लाभणार आहे. भिवंडी लोकसभा मतदारसंघाचे खासदार सुरेश म्हात्रे, आमदार किसन कथोरे, शांताराम मोरे, शिवसेना नेते प्रकाश पाटील, शिवसेना ठाकरे गटाचे उपनेते विश्वास थळे, भिवंडी महापालिकेचे महापौर नारायण चौधरी यांच्यासह विविध क्षेत्रांतील मान्यवर उपस्थित राहणार आहेत. दोन दिवस चालणाऱ्या सोहळ्यात शिवराज्याभिषेक विधी, पालखी सोहळा, धर्मवीर छत्रपती संभाजी महाराज जयंती उत्सव, शिवतुलादान, देवीचा गोंधळ, महाआरती, पोवाडे, भजन, कीर्तन तसेच विविध सांस्कृतिक कार्यक्रम असणार आहेत. छत्रपती शिवाजी महाराजांचा पराक्रम, त्यांचे राष्ट्रकार्य आणि हिंदवी स्वराज्याचा वैभवशाली इतिहास जनमानसापर्यंत पोहोचविण्याच्या उद्देशाने हा सोहळा उत्साहात साजरा केला जाणार असल्याचे आयोजकांनी सांगितले. राज्यभरातील शिवभक्त, इतिहासप्रेमी आणि नागरिकांनी उपस्थित राहून शिवराज्याभिषेक सोहळ्याचा लाभ घ्यावा, असे आवाहन डॉ. राजू चौधरी यांनी केले आहे.