पडघा, ता. २२ (बातमीदार) : भिवंडी तालुक्यातील कुरुंद येथील बी. बी. पाटील इंग्लिश हायस्कूल ॲण्ड ज्युनियर कॉलेजमध्ये आंतरराष्ट्रीय योग दिन विविध मान्यवरांच्या उपस्थितीत उत्साहात साजरा करण्यात आला.

दरवर्षीप्रमाणे यावर्षीही बी. बी. पाटील इंग्लिश हायस्कूल ॲण्ड ज्युनियर कॉलेज येथे आंतरराष्ट्रीय योग दिन कार्यक्रम रविवारी (ता. २२) सकाळी घेण्यात आला. या वेळी ८ वीच्या विद्यार्थ्यांनी ताडासन, वृक्षासन, वज्रासन, भुजंगासन, शवासन आणि अनुलोम-विलोम या आसन योगाचे महत्त्व समजावून सांगून उपस्थितांकडून आसने करून घेतली.

या वेळी पडघा पोलिस ठाण्याचे पोलिस निरीक्षक पंकज गिरी, भाजप ग्रामीण पूर्व मंडळ तालुका अध्यक्ष श्रीकांत गायकर, माजी उपसभापती गुरुनाथ जाधव, केतन पाटील, तुकाराम बजागे, अजय टोळे, अशोक शेरेकर, शशिकांत ठाकरे, प्राथमिक व माध्यमिक विभागाच्या मुख्याध्यापिका अनामिका विशे, उच्च माध्यमिक विभाग मुख्याध्यापिका मोनिका पाटील, शिक्षक, पालक, विद्यार्थी मोठ्या संख्येने उपस्थित होते.