जिल्हा कारागृह येथे योग दिन उत्साहात
अलिबाग, ता. २२ (वार्ताहर) : जिल्हा कारागृह प्रशासन व उज्ज्वल भविष्य सामाजिक संस्थेमार्फत रविवारी (ता. २१) अलिबाग जिल्हा कारागृहातील बंद्यांसाठी आंतरराष्ट्रीय योग दिन उत्साहात साजरा झाला.
योगदिनानिमित्त संस्थेच्या अध्यक्ष उज्वला चंदनशिव, योगशिक्षक ममता म्हात्रे व उत्कर्षा गुरव यांनी विविध योग प्रात्यक्षिकांच्या माध्यमातून मानसिक आणि शारिरिक संतुलन कसे राखले जाते, तसेच योगाभ्यासातून बौद्धिक पातळी कशी सुधारते, आपण आपल्या भावना स्थिर व एकाग्र कशा ठेवू शकतो याबाबत महत्त्व विशद केले.
या जागतिक योग दिन कार्यक्रमात अलिबाग जिल्हा कारागृहातील ११ महिला बंदी व ३६ पुरुष बंद्यांनी सहभाग नोंदवत उत्स्फुर्त प्रतिसाद दिला. यावेळी आंतरराष्ट्रीय योग दिनानिमित्त अधीक्षक विशाल बाळासाहेब बांदल यांनी बंद्यांना नियमित योगा करण्याचे फायदे याबाबत मार्गदर्शन केले.
या कार्यक्रमाचे यशस्वी नियोजनासाठी सुभेदार देवलु मुकुंद रांजड, महिला शिपाई रामेश्वरी ढाळगे, कारागृह शिपाई महाबिर जगताप, नरसु कोळी, बाबासाहेव वाणी, अजय जावळे यांनी मेहनत घेतली.