अवचितगडाचा वारसा जपला
दोन ऐतिहासिक तोफा सुरक्षितपणे गडावर
रोहा, ता. २२ ( बातमीदार) : अवचितगडावरील ऐतिहासिक वारसा जतन करण्याच्या उद्देशाने शिवशंभो प्रतिष्ठान, रोहा आणि सह्याद्री वन्यजीव रक्षणार्थ सामाजिक संस्थेने संयुक्त मोहीम राबवून सुमारे ३५० ते ४०० किलो वजनाच्या दोन ऐतिहासिक तोफा खोल दरीतून सुरक्षितपणे बाहेर काढून गडावर पुन्हा स्थापित केल्या.
१२ ते १५ जूनदरम्यान झालेल्या गड-अभ्यास मोहिमेत या तोफा गडाच्या उत्तरेकडील बुरुजाजवळील दरीत आढळून आल्या होत्या. सर्व कायदेशीर प्रक्रिया पूर्ण करून २० जून रोजी प्रत्यक्ष संवर्धन मोहिमेला सुरुवात करण्यात आली. पहिली तोफ सायंकाळपर्यंत गडावर आणण्यात यश आले, तर दुसरी तोफ दुर्गम दरीत असल्याने ‘टेक्निकल रोप रेस्क्यू’ प्रणाली, अचूक अँकरिंग आणि भारवाटप तंत्राचा वापर करून बाहेर काढण्यात आली.
बचाव पथकाने यापूर्वी व्यक्तींच्या बचाव मोहिमा केल्या असल्या तरी एवढ्या वजनाच्या ऐतिहासिक वस्तूची रिकव्हरी हा त्यांच्यासाठी नवा अनुभव ठरला. या मोहिमेमुळे अवचितगडाचा ऐतिहासिक ठेवा सुरक्षित झाला असून, दोन्ही संस्थांच्या कार्याचे इतिहासप्रेमींकडून कौतुक होत आहे.

फोटो कॅप्शन : , रोहा, अवचितगडावर खोल दरीतून तोफ काढून झाल्यावर सोबत सदस्य