विक्रमगड, ता. २३ (बातमीदार) : ‘एक पृथ्वी, एक आरोग्यासाठी योग’ या संकल्पनेवर आधारित आंतरराष्ट्रीय योग दिन जिल्हा परिषद केंद्रशाळा विक्रमगड येथे मोठ्या उत्साहात, शिस्तबद्ध वातावरणात आणि विद्यार्थ्यांच्या उत्स्फूर्त सहभागातून साजरा करण्यात आला. योगाचे महत्त्व विद्यार्थ्यांपर्यंत पोहोचविण्यासाठी विविध योगासने व प्राणायामांचे प्रात्यक्षिक सादर करण्यात आले.
कार्यक्रमाची सुरुवात प्रार्थनेने करण्यात आली. त्यानंतर विद्यार्थी आणि शिक्षकांनी सामूहिकरीत्या शिथिलीकरण क्रिया, ताडासन, वृक्षासन, पादहस्तासन, भुजंगासन यांसह विविध योगासने केली. तसेच कपालभाती, अनुलोम-विलोम आणि भ्रामरी प्राणायामाचे प्रात्यक्षिक करून त्यांच्या आरोग्यदायी फायद्यांची माहिती देण्यात आली. सर्वांनी एकत्रितपणे कॉमन योग प्रोटोकॉलचे पालन करत योगाभ्यास केला.
या वेळी विद्यार्थ्यांना नियमित योगाभ्यासाचे महत्त्व समजावून सांगताना मुख्याध्यापिका सिंधू सहारे, पदवीधर शिक्षिका रंजना भोईर, शिक्षक संजय चौधरी आणि शिक्षिका निर्मला महाकाळ यांनी योगामुळे शारीरिक, मानसिक आणि भावनिक आरोग्य सुदृढ राहण्यास मदत होते तसेच एकाग्रता, आत्मविश्वास आणि सकारात्मकता वाढते, असे मार्गदर्शन केले.