उलवेमध्ये झाड कोसळले
उलवे, ता. २३ (बातमीदार) ः येथील सेक्टर २५ मधील प्लॉट क्रमांक ६५ ते ६८ समोरील पुलालगतच्या मुख्य रस्त्यावर वादळी वाऱ्यामुळे मोठे झाड उन्मळून पडले. झाड रस्त्याच्या मधोमध कोसळल्याने या मार्गावरील वाहतूक पूर्णपणे विस्कळित झाली होती. या घटनेत कोणतीही जीवितहानी झाली नाही.
या परिसरात पुलाच्या बाजूला असलेल्या दगडी टेकडीवर मोठ्या प्रमाणात झाडी, वेली आणि सुकलेले गवत वाढलेले आहेत. पावसाळ्यात टेकडीवरील सैल दगड, वाढलेली झाडीमुळे दरडी कोसळण्याचा धोक्याची भीती आहे. या भागामुळे रस्त्याला हानी पोहोचू नये यासाठी सिडकोकडून काही उपाययोजना करण्यात येणार असल्याचे यापूर्वी सांगण्यात आले होते. मात्र, प्रत्यक्षात कोणतीही ठोस कारवाई न झाल्याने पहिल्याच वादळात झाड कोसळल्याची घटना घडली आहे, असे स्थानिक नागरिकांचे म्हणणे आहे.