ॲफॅक इंग्लिश स्कूलमध्ये आंतरराष्ट्रीय योग दिन उत्साहात
चेंबूर, ता. २३ : ॲफॅक इंग्लिश स्कूलमध्ये आंतरराष्ट्रीय योग दिन उत्साहपूर्ण वातावरणात साजरा करण्यात आला. या निमित्ताने अंबिका कुटीर योग संस्थेच्या प्रशिक्षिका सीमा शुक्ला आणि त्यांच्या सहकाऱ्यांनी विद्यार्थ्यांकडून विविध योगासने व प्राणायामाची प्रात्यक्षिके करून घेतली.
कार्यक्रमादरम्यान शाळेच्या मुख्याध्यापिका श्रीमती स्नेहा कुळये यांनी विद्यार्थ्यांना योगाचे महत्त्व पटवून दिले. योगामुळे शारीरिक व मानसिक आरोग्य सुदृढ राहते, तणावमुक्त जीवन जगता येते तसेच वैयक्तिक प्रगतीसाठी योगसाधना अत्यंत उपयुक्त असल्याचे त्यांनी सांगितले. त्यांनी आंतरराष्ट्रीय योग दिनाचे महत्त्वही विद्यार्थ्यांना समजावून सांगितले. या वेळी संस्थाचालक मंडळातील पदाधिकारी उपस्थित होते. विद्यार्थ्यांनी मोठ्या उत्साहाने योग प्रात्यक्षिकांमध्ये सहभाग घेतला.